HANDVERK OG HÖNNUN í ráðhúsi Reykjavíkur 2024

Sýningin HANDVERK OG HÖNNUN í ráðhúsi Reykjavíkur hefur verið haldin árlega í 21 ár og þann 7.-11. nóvember næstkomandi fer hún fram í 22. sinn. Árlega sækja þúsundir fólks sýninguna og hefur viðburðurinn fest sig í sessi sem fyrsta skref í undirbúningi jóla.

Í handverki listmanna og hönnun er að finna einstaka og sérstæða þekkingu á efni og aðferðum sem listamennirnir hafa þróað með sér í áranna rás. Handverk er í eðli sínu sjálfbært og hefur í gegnum kynslóðir borið áfram sértæka þekkingu á nýtingu íslenskra afurða.

Vörur í handverkslist og -hönnun geta verið góð fjárfesting þar sem þær hafa tilhneigingu til að vaxa að verðgildi með tímanum vegna sérþekkingar listamannsins sem býr í verkinu.