Mjúkt & Hart - keramiksýning
Mjúkt & Hart er samsýning átta keramikera og hönnuða sem eiga í sameiningu Kaolin Keramik Galleri sem einnig er til húsa á Skólavörðustíg 5.
Heiti sýningarinnar lýsir andstæðum sem liggja sem rauður þráður gegnum allt ferlið við sköpun verks úr leir. Leirinn er tekinn mjúkur úr jörðinni. Hann harðnar ofan jarðar en komist hann í tæri við vökva getur hann runnið úr greipum okkar og samlagast jörðinni aftur. Í hita eldsins umbreytist hann og verður svo harður að sjálfur tíminn vinnur varla á. Tímanum, sem yfirvinnur allt að lokum, tekst varla að eyða leir hertum í eldi eins og sagan sannar. Það hefur gert okkur kleift að kynnast verkum þeirra formæðra og feðra sem voru með þeim fyrstu til að umbreyta þessu magnaða efni úr mjúku í hart. Í höndum okkar mótum við form þar sem andstæðurnar hart/mjúkt kallast gjarnan á til að skapa spennu og eftirvæntingu í verkum okkar. Hvassir harðir tindar eða mjúkar ávalar hæðir lífsins taka sér bólfestu í huga okkar og í því rými verður til sú hugmynd sem sprettur fram í sköpun okkar. Það kallast innblástur.
Með sýningunni Mjúkt & Hart vilja sýnendurnir við gefa gestum innsýn í hvernig þær, hver fyrir sig, nýta sér þessar andstæður með ólíkum hætti.
Sýnendur eru: Þórdís Baldursdóttir, Svafa Einarsdóttir, Sigrún Jóna Norðdahl, Katrín V. Karlsdóttir, Inga Elín, Guðný Magnúsdóttir, Embla Sigurgeirsdóttir og Dagný Gylfadóttir.
Sýningin stendur til 17. apríl 2019