Tilnefningar til Hönnunarverðlauna Íslands
Á hverju ári eru Hönnunarverðlaun Íslands veitt fyrir þau verk sem þykja framúrskarandi á sviði hönnunar og arkitektúrs.
Hönnunarverðlaun Íslands eiga að varpa ljósi á mikilvægi og gæði íslenskrar hönnunar og arkitektúrs. Vægi hönnunar sem partur af menningu, samfélagi og viðskiptalífi er alltaf að aukast og beina hönnunarverðlaunin sjónum að því besta sem gert er á sviði hönnunar og arkitektúrs á Íslandi um leið og einstaka hönnuðum eða hópum hönnuða er veitt mikilvæg viðurkenning. „Verðlaunin eru veitt hönnuði, arkitekt, hönnunarteymi eða stofu fyrir framúrskarandi ný verk; einstakan hlut, verkefni eða safn verka. Hönnuðir þurfa að vera félagar í einu af aðildarfélögum Miðstöðvar hönnunar og arkitektúrs eða fagmenn á sínu sviði til að hljóta verðlaunin. Ný verk eru verk sem lokið hefur verið við á síðustu tveim til þremur árum fyrir afhendingu verðlaunanna.”
Við val á verðlaunahafa er verið er að leita að framúrskarandi verki, eða safni verka. Verkið/verkin þurfa að vera einstök, fela í sér frjóa hugsun, snjalla lausn, vandaða útfærslu og fagmennsku í vinnubrögðum.
Hönnunarverðlaun Íslands eru peningaverðlaun að upphæð 1.000.000 krónur, sem hafa verið veitt af ráðherra ferðamála, iðnaðar- og nýsköpunar.
Tilnefningarnar í ár eru þrjár:
- Peysa með öllu eftir textílhönnuðinn Ýr Jóhannsdóttur sem hannar undir nafninu Ýrúrarí.
- Drangar eftir Studio Granda.
- Flotmeðferð eftir fyrirtækið Flothettu, hannað af Unni Valdísi Kristjánsdóttur.
Þá er veitt viðurkenning fyrir bestu fjárfestingu í hönnun en sú viðurkenning var fyrst gefin árið 2015.
„Fyrirtæki sem eiga þess kost að hljóta viðurkenninguna Besta fjárfesting í hönnun hafa hönnun og arkitekúr að leiðarljósi frá upphafi verka til að auka verðmætasköpun og samkeppnishæfi. Öll fyrirtæki sem starfa á Íslandi koma til greina.”
Miðstöð hönnunar og arkitektúrs stendur að verðlaununum í samstarfi við Hönnunarsafn Íslands, Listaháskóla Íslands, Landsvirkjun, Íslandsstofu og Samtök iðnaðarins.
Verðlaunaafhendingin fer fram með rafrænum hætti, hér, þann 29. janúar n.k. kl. 11.00.